Antony Blinken avuga ko Amerika itewe umutima uhagaze no kuba umugwi Wagner uriko urakwiragira mu karere ka Sahel
Umunyamabanga wa Reta zunze Ubumwe za Amerika ajejwe imigenderanire Antony Blinken yabwiye BBC ko umugwi w’abacangero wa Wagner wo mu Burusiya uriko “wikika mu kiza” kubera umutekano muke.
Ico gihugu kirongowe n’abasirikare batembagaje ubutegetsi bwa prezida Mohamed Bazoum haraciye hafi indwi zibiri.
Hari ibivugwa ko abatembagaje ubutegetsi boba basavye ubufasha Wagner, umugwi uzwi ko uri mu gihugu kibanyi ca Mali.
Blinken yavuze ko atibaza ko Uburusiya canke Wagner ari bo bagize uruhara muri iryo tembagazwa ry’ubutegetsi.
Mu kiganiro Focus on Afrika ca BBC yavuze ko ariko Amerika yari ifise ubwoba ko uwo mugwi “ushobora guca ugaragara” mu duce tumwe tumwe tw’akarere ka Sahel.
Blinken agira ati:”Nibaza ko ivyashitse, n’ibibandanya kuba muri Niger bitatewe n’Uburusiya canke Wagner, ariko… bariko baragerageza kwikika mu kiza.
“Mu kibanza ico ari co cose uwo mugwi wa Wagner wagiyemwo, hakurikiye ubwicanyi, isamburwa ry’ibintu no kugirwa abaja.”
“Habandanije kuba umutekano muke, umutekano ntiwigeze wongerekana.”
Yongeyeko ko vyari ” ibisa n’ivyabaye mu bindi bihugu, aho ata kintu na kimwe bazanye uretse ingorane gusa.”
Vyibazwa ko Wagner ifise ibihumbi n’ibihumbi vy’abagwanyi mu bihugu bitandukaye harimwo Centrafrique, na Mali, aho bakora urudandazwa rukomeye ari na ko bafasha gutsimbataza imigenderanire bafitaniye n’Uburusiya hamwe n’ubucuti muvyo ubudandaji.
Abagwanyi b’uwo mugwi baragirizwa gusinzikaza agateka ka zina muntu mu bihugu vyinshi vya Afrika.
N’aho biri uko, hari ibivugwa ko igisirikare ca Niger casavye Wagner ubufasha mu gihe ico gihugu gihanganye n’igitero ca gisirikare gishobora kwaduka.
CEDEAO – ishirahamwe ry’akarere rihurikiyemwo ibihugu 15 – yari yatanze igihe ntarengwa co gushika ku musi w’Imana ku basirikare bafashe ubutegetsi ngo babe bakinjuye basubize ubutegetsi prezida Bazoum.
Ico kiringo ntarengwa nta gaciro cahawe, CEDEAO ikaba igiye gutunganya inama ku musi wa kane yo gufata ingingo ku bigiye gukorwa.
Ku musi wa mbere, icegera c’umunyamabanga ajejwe imigenderanire ya Amerika Victoria Nuland, yaragiraniye ico yise ibiganiro “bigoye ariko ata guca hirya no hino” n’abafashe ubutegetsi, avuga ko batahuye inkurikizi zo gukorana n’abacangero.
Prezida Bazoum ubu apfunzwe, na we yaravuze amakenga afise ku gihagararo ca Wagner muri Afrika.
Mu nyandiko yiwe yatangajwe mu kinyamakuru ca Washington Post mu ndwi iheze, yagize ati:”Ku butumire bw’abatembagaje ubutegetsi n’ababashigikiye, akarere kose ka Sahel gashobora kugwa mu minwe y’abarusiya biciye ku mugwi Wagner, iterabwoba ryawo ryagaragaye mu gihugu ca Ukraine.”
Muri kino gihe ntawuramenya nimba abagwanyi ba Wagner barinjiye muri ico gihugu ariko umuhora wa Grey Zone wo kuri Telegram ukoreshwa na Wagner wamenyesheje ku musi wa mbere ko mu bagwanyi bawo abashika 1.500 baherutse kurungikwa muri Afrika.
Ntibavuze aho barungitswe kuri uwo mugabane.
Umukuru wa Wagner, Yevgeny Prigozhin yahamagariye abafashe ubutegetsi “kudutera akamo” mu butumwa bw’ijwi bwashizwe kuri Telegram ku musi wa kabiri.
Yagize ati:”Misi yose turi mu ruhande rw’ineza, rw’ubutungane, no ku ruhande rwabo baharanira ubwigenge n’uburenganzira bw’abanyagihugu babo.”
